Од коло во коло има се помалку дилеми за освојувачот на шампионската титула во домашното фудбалско првенство. Се расчистува ситуацијата и за третото место на табелата што го дава вториот учесник во европската Лига на УЕФА, па интерес добива битката за опстанок. Ако лидерот не е променет со месеци, променет е фенерџијата. Брегалница го препушти таквиот статус на Македонија по победата во меѓусебниот дуел, но одиме со ред.
Вардар не дозволи луксуз ниту со Пелистер. „Црвено-црните“ ги совладаа битолските „зелени“ со 3:1 на „Телеком арена“ и уште еднаш покажаа кој е главен во домашната сцена во оваа сезона. Работата ја завршија уште во првиот дел со три гола за рутинско одработување на вториот во кој го примија единствениот гол. Џонатан Балотели погоди во 12 минута, Стефан Спировски во 42. и Тигран Барсегјан во 44. за заминување на одмор со комотни 3:0. Почесниот за пелистерци го постигна Ковачев од пенал во 67 минута.
Шкендија направи уште еден кикс што и дефинитивно ја чини титула. Вицепрвакот ремизира (1:1) со градскиот ривал Ренова и го зголеми минусот на 11 бода во однос на вардарци што многу веројатно ќе значи и фокусирање на куп трофејот за спас на сезоната. Стојан Велинов обезбеди водство за тимот од Џепчиште во 75 минута, „црвено-црните“ израмнија преку Бесарт Ибраими во 83. И покрај брзото враќање, Шкендија во преостанатиот десетина минути од средбата не успеа до втор погодок за целосен пресврт.
Шкупи забележа важна победа за опстанокот во лигата. Чаирчани пред своја публика го поразија Силекс со 3:1 и се одлепија од триото загрозени екипи. Ермедин Адем во 6 минута, Емануел Мбела во 24 минута и Буњамин Шабани во 56. „тресеа“ за домашните, Антонио Каланоски во 77 минута за кратовци. Со голот на Бобан Георгиев во 57 минута, Брегалница ја совлада Македонија Ѓ.П., а победник и голови немаше на средбата меѓу Победа и Работнички. Дебармаалци сега имаат 43 бода, шест повеќе од Пелистер во борбата за третото место на табелата што, многу веројатно, и ќе го задржат до крајот на шампионатот.
Прва лига, 26 коло
Резултати
Вардар – Пелистер 3:1
Шкендија – Ренова 1:1
Победа – Работнички 0:0
Брегалница – Македонија Ѓ.П. 1:0
Шкупи – Силекс 3:1
Табела: Вардар 62, Шкендија 51, Работнички 43, Пелистер 37, Силекс 35, Ренова 32, Шкупи 28, Победа 23, Брегалница 19, Македонија Ѓ.П. 17.
Идно коло (15 април): Силекс – Вардар, Пелистер – Шкендија, Работнички – Брегалница, Ренова – Победа, Македонија Ѓ.П. – Шкупи.