Младата фудбалска репрезентација на Македонија во септември ќе влезе во квалификации за Европското првенство во Италија во 2019 година. Новиот циклус ќе биде дочекан со нова генерација на играчи кои се родени во 1996 година и помлади. Најголем дел од тимот што обезбеди пласман на претстојното ЕП во Полска, ова лето, ја проби возрасната граница и нема право на настап наесен, па селекторот Благоја Милевски е во финалната фаза на изградба на нов состав со кој ќе атакува на бодови за наредниот континентален турнир.
Новиот У21 проект попладнево ќе има тест со Црна Гора. Натпреварот е закажан во 14 часот во тренинг комплексот „Петар Милошевски“ крај ФФМ и ќе биде последен во селектирањето на играчи пред почетокот на квалификациите.
„Натпреварот со Црна Гора треба да биде показатал за психолошката подготвеност на фудбалерите да се носат со притисок против подобро рангиран ривал. Се надевам дека сите повикани ќе искажат квалитет и нивниот однос кон репрезентацијата ќе биде на највисоко ниво. Секој што ќе добие шанса ќе треба и да се потврди. На нив останува дали ќе задржат место во тимот. Ова е последно селектирање пред квалификациите за Европското првенство во 2019 година“, потенцира Милевски пред дуелот со Црногорците.
За Елиф Елмаз, член на Работнички, денешната средба е вистински тест за нвата генерација на играчи во У21 селекцијата.
„Не чувствуваме никаков притисок. Привилегија е што сме повикани во репрезентацијата на Македонија, наше е да ја оправдаме довербата. Начинот на работа на селекторот Благоја Милевски го знаеме, сериозно пристапивме на подготовките и се надевам дека ќе возвратиме со добра игра против Црна Гора. Ова е нова генерација на фудбалери кои, сепак, имаат квалитет за нови големи резултати“, нагласува офанзивниот играч на скопски Работнички.
Мотиви нагласува и вардаровиот напаѓач Петар Петковски од кого се очекуваат голови во младата селекција во иднина.
„Одиме на победа. Иако е пријателски натпревар, сепак, сме максимално мотивирани и со желба да одиграме најдобро што умееме. Нема притисок и страв. Уживавме на тренинзите и на заедничките подготовки во изминатите денови, се надевам дека ќе уживаме и на теренот денеска“, нагласи Петковски.