Александар Васоски ќе биде предводникот на Вардар во првиот меч со Фенербахче во плеј-офот за Лига Европа. Досегашниот асистент во стручниот штаб ги презема „црвено-црните“ по оставката на Гоце Седлоски што ја оправда со двата пораза од Копенхаген во квалификациите за Лигата на шампиони и од Шкендија во домашното првенство.
Најблиску до тренерско место во Вардар, пак, е Чедомир Јаневски. Поранешниот македонски селектор допатува во Скопје на завршни преговори со раководство на вардарци и, според информации од клубот, двете страни се блиску до крунисување со договор на взаемниот интерес за соработка.
Најавите се оптимистички и одат дотаму што за утре е закажана и промоција на Јаневски за наследник на Седлоски, но поради временскиот теснец до мечот со Фенербахче, тој ќе може да помага со совети од трибините во четврток вечер на „Телеком арена“.
Последните тренерски ангажмани со поврзани со белгиски клубови. По една сезона во изминатите три минуваше на кормилата на Васланд Беверен (2016/17), на Мускрон (2015/16) и на Монс (2013/14). Беше селектор на Македонија во периодот 2012-2013 година.
До селекторскиот ангажман работеше во кипарските клубови Етникос Ахна (сезона 2011/12) и Енозис Паралимни (2009/11), во белградска Црвена звезда (2008/09) и во белгиски Бриж (2007 година) како прв тренер и во грчки Олимпијакос (2005-2007) и во Гент (2007/08) како асистент.