Пратеникот Африм Гаши, кој го предводи едното крило на Беса, денеска изјави дека се на чекор до влез во Владата и ако тоа навистина се случи токму тие ќе бидат будното око на Владата, особено во делот на корупцијата.

 Гаши потврдува дека имале неколку средби со премиерот Зоран Заев, но вели дека премиерот го има последниот збор и дека треба да избере меѓу двете крила на Беса.
– Мислам дека на премиерот не му треба надворешни проблеми да влезат во Владата. Мислам дека тој треба да избере помеѓу двете крила на Беса, рече пратеникот одговарајќи на новинарско прашање дали е можно двете крила на партијата да влезат во составот на Владата.
Тврди дека не разговарале за министерско место во правда, потенцирајќи дека тие имаат кадри за сите институции.
 Гаши го предводи крилото во кое се и пратениците Неџбедин Каремани и Реџеп Мемеди, додека во крилото на Билал Касами се пратениците Фадил Зендели и Теута Биљали.

Лидерот на ДУИ Али Ахмети денеска не одговори на новинарско прашање, дали ДУИ ќе отстапи од своите ресори за сметка на Беса, чии две крила преговараат со премиерот Зоран Заев за влез во Владата.

– -Јас не сум препорадавач на Бит пазар за да давам или земам министерства, преговорите се одвиваат меѓу политичките партии, на тезга не работам. Тоа е работа меѓу политичките партии со тек на време ќе видеме како ќе менаџираме и како ќе одлучиме во однос на тоа прашање. Сигурно дека ДУИ е многу сериозна партија и е во тек со се што се одвива во земјава, ние не сме гледачи туку актери во одлучувањето во политиката, кажа Ахмети.

Премиерот Зоран Заев пред два дена по завршувањето на рочиштето за „Поткуп“ изјави дека е се уште рано да се зборува за реконструкција на Владата и оти прво треба да бидат завршени разговорите за зголемување на парламентарното мнозинство.

– Не сме дошле дотаму. Јас реков дека до крајот на месецов ќе разговараме за зголемување на парламентарното мнозинство. Ред е прво да видиме за колку ќе порасне и ако порасне тоа парламентарно мнозинство, следна фаза би биле комбинаториките околу кадровските и персоналните решенија. Навистина сѐ уште е рано за тоа – рече Заев одговарајќи на новинарско прашање.

Инаку, разговорите за проширување на парламентарното мнозинство се водеа и во текот на викендот, а целиот процес, како што претходно најави Заев, треба да биде заокружен на крајот на месецов. Заев претходно рече и дека има поддршка од лидерот на ДУИ, Али Ахмети, за зголемување на владејачката коалиција.

– Неопходно е проширување на парламентарното мнозинство со нови коалициски партнери поради сериозните прашања што претстојат и за поефикасна работа на Собранието и на пратениците, рече Заев.