Германија „веднаш“ ќе и достави уште 64 системи за противвоздушна одбрана Патриот на Украина, изјави германскиот министер за одбрана на вториот ден од средбата на НАТО во Брисел.
– Одлуката е многу важен знак за поддршка за успешните напори на украинските вооружени сили да обезбедат воздушна одбрана, особено сега во оваа конкретна фаза од војната, посочи Писториус.
Германија минатиот месец најави помош во висина од речиси три милијарди долари за зајакнување на одбраната на Украина, што е најголемо ветување за воена помош од почетокот на војната.
Истовремено и американскиот државен секретар Антони Блинкен денеска изјави дека Украина ќе добие дополнителна хуманитарна помош од САД во висина од 205 милиони долари.
Блинкен истакна дека тоа е „критично важна поддршка за украинскиот народ“. Средствата ќе бидат наменети за храна, вода за пиење, како и за образование, здравствена заштита, правна помош и друго. Обезбедени се и средства за да се помогне во одржувањето контакт меѓу членовите на разделените семејства.
Повеќе од шест милиони Украинци ја напуштија својата татковина од почетокот на руската инвазија. Повеќе од пет милиони се внатрешно раселени.
Досега Вашингтон за Украина има обезбедено хуманитарна помош во износ од повеќе од 2,1 милијарди долари.
извор: МИА