Изненадувачки големиот број на мутации откриени на шилестиот протеин кај новата варијанта на коронавирусот, наречена Омикрон, може да укажува дека истиот потекнува од пациенти со ХИВ или некоја друга форма на имунодефициенција, изјави германскиот имунолог и секретар на Германското здружение на имунолози, Карстен Вацл.

Тој смета дека оваа претпоставка е веродостојна и истата ја поткрепува со слични истражувачки резултати откриени во други медицински случаи.

ХИВ е вирус на хумана имунодефициенција, а името го добил од англискиот назив Human Immunodeficiency Virus. Предизвикува уништување на одбранбениот систем на организмот и доведува до појава на разни болести.

Имунодефициенција е слабост и неспособност на имунолошкиот систем на организмот да се бори со разни болести. Вацл додава дека кај луѓе со ослабен имунитет вирусот може да се реплицира во текот на неколку недели.

Имунологот објаснува дека “за време на овој процес, може да се појават повторени изолирани мутации, што можеби нема да му дадат никаква предност на вирусот, но тие сепак би можеле да продолжат да се размножуваат, бидејќи имунолошкиот систем не е во состојба да ги контролира“.

Тој додава дека таков процес може да резултира со дополнителни мутации и таквата комбинација може да му даде дополнителна предност на вирусот.

Во споредба со оригиналниот вид на коронавирус, кој првпат се појави во Вухан, Кина, Омикрон има дури околу 30 промени на аминокиселините само на шилестиот протеин, па затоа е толку променет, што постоечките антитела  тешко го препознаваат, а затоа е тешко  да се открие и на тестовите.