Австралиската полиција денеска ја приведе чешката тенисерка Рената Ворацова и ѝ наложи да ја напушти земјата, објави локалниот портал „Ејџ“.
Ворацова без проблем влегла во земјата, иако не била вакцинирана, а виза добила врз основа на потврда за прележан коронавирус во изминатите шест месеци. Виза врз истата основа доби и Новак Ѓоковиќ, кој беше приведен уште на аеродромот во Мелбурн.
Чешката тенисерка до денеска без проблем играше на турнирот во Мелбурн, но беше уапсена по скандалот со Ѓоковиќ и спроведена во карантин во кој се наоѓа и српскиот тенисер.
Австралиската гранична полиција сооошти дека и на неа, како и на Ѓоковиќ, е поништена визата, меѓутоа засега не е познато дали и таа ќе поднесе жалба.
Во соопштението се наведува дека полицијата трага по уште еден тенисер кој, исто така, добил виза поради прележан ковид-19, но неговото име не е наведено.
Тениската федерација на Австралија и Министерството за здравство на сојузната држава Викторија им одобруваат визи на оние кои не се вакцинирани, а прележале коронавирус во изминатите шест месеци, додека федералната влада не одобрува.
Поради тоа настана хаос што треба да го решава судот. Правните експерти во Австралија сметаат дека се направени доста пропусти и дека не е јасно кој за што е надлежен, ако некои тенисери влегле во земјата, а некои не, иако имале идентична основа за добивање на виза.