Новак Ѓоковиќ повлече радикален потег по лошите настапи во 2017 година. Српскиот тениски ас е во потрага по нов стручен штаб по изненадувачкиот прекин на соработката со членовите на досегашниот. Разделбата ги опфаќа Марјан Вајда (тренер), Гебхард Грич (кондициски тренер) и Милјан Амановиќ (физиотерапевт) кој е воедно и негов кум.
„Бескрајно сум благодарен на Марјан, на Џиџи и на Милјан за децениското пријателство и нивна професионалност, посветеност и пожртвуваност на моите цели. Без поддршката од нив и резултатите немаше да бидат такви. Постојано беа моја сила и ветар во грб. Одлуката не беше лесна, но заеднички почувствувавме дека ни е потребна промена. Тие се мое семејство и тоа никогаш нема да се промени“, изјави Ѓоковиќ.
Поранешниот најдобар светски рекет е непрепознатлив во текот на оваа година. Досега освои само 655 бода, ефект каков што не памети во последните 11 години. На промената на соработниците се гледа како „шок терапија“ што треба да продуцира постепено враќање на старите патеки.
„Имам впечаток како да почнувам од почеток. Ми се допаѓа тој предизвик. Борец сум и една од моите најголеми цели е враќање во победничка форма“, додаде Србинот чиј нов тренер сè уште е непознат.
Ѓоковиќ е во криза од крајот на 2016 година. Падот во формата почна во летниот период, доживеа фијаско на Летните олимписки игри во Рио де Жанеиро, во септември го препушти првото место на АТП ранг листата на Енди Мареј и до крај на сезоната не успеа да се врати. Сето тоа во меѓувреме доведе до прекин на соработката со Борис Бекер кој, пак, во неколку прилики изнесе забелешки за блискоста со Пепе Имаз.
„Треба време да ја најдам вистинската личност со која ќе може да се поврзам на професионално ниво. Не сакам да брзам со одлуките. На претстојните турнири ќе патувам со поддрѓка на семејството и на менаџерот“, порача Ѓоковиќ кој бледо влезе и во 2017 година што резултира со многу неодбранети бодови.