Се е подготвено за осмото издание на Отвореното првенство на Македонија во голф што ќе се одржи претстојниот викенд на терените на Пирин Голф & Кантри клуб во Банско, Бугарија. Рокот за аплицирање за учество заврши (среда, 21 август) и сите пријавени учесници ќе бидат поделени во две конкуренции – дивизија А или т.н. „stroke play“ формат со две рунди по 18 дупки и дивизија Б или т.н. „single stableford“ формат со, исто така, две рунди по 18 дупки. За нов македонски шампион ќе биде промовиран играчот со најдобар грос резултат.
Котизацијата за учество на турнирот беше 45 евра за играчи со годично членство во Пирин Голф & Кантри клуб, за гости, односно, „Pay&Play“ членови е 75 евра. Од организаторите и напомена дека сите пријавени учесници треба да ги подмират обврските најдоцна до сабота наутро пред почеток на натпреварувачкиот дел.
Победниците во обете конкуренции (дивизија А и дивизија Б) ќе бидат одлучени по вкупно 36 дупки што ќе се играат по голферски правила одобрени од „Royal&Ancient Golf Club of St. Andrews“ и според локалните правила на натпреварувачката Комисија.
За најдобрите тројца голфери во дивизија А и во дивизија Б се предвидени трофеи и награди од организаторот на настанот кој ќе додели и Грос признание за најдобар македонски голфер и посебна награда за „најдолг драјвер&најблиску до Пин“. Осмото издание на Отвореното македонско првенство во голф ќе стартува со петочните двојни тренинг сесии (претпладне и попладне) што се замислени како турнирски рунди, а котизацијата за учество во една од нив со 18 дупки изнесува 20 евра.