Патот е трасиран, првото полувреме од мисијата Фајналфор беше одлично одработен во СРЦ „Кале“ и во Албанија се заминува по континуитет на победничката низа и за потврда на приматот во групата А. Ваков заклучок, но и најави и очекувања испорача македонската машка одбојкарска репрезентација пред вториот турнир во годинашното издание на Европската лига што ќе се одржи во „Олимпик парк“ во Тирана.
„Она што е зад се максимални девет освоени бода, она што е пред нас е неопходност од само една победа за сигурно учество на Фајналфор турнирот. Резултатите од Скопје оставаат многу простор и за тактичко воигрување во Тирана, секако, по осигурување на целта. Не очекувавме дека ќе бидеме така убедливи на првиот турнир, но тоа никако не смее да значи опуштање пред вториот. Потребно е да останеме мирни, да го задржиме истиот пристап, да наметнеме и негуваме наш стил на игра и ментално да се подигнуваме за завршницата“, истакна македонскиот капитен, Никола Ѓорѓиев.
Македонија, навистина, беше убедлива на трите меча во Скопје што најдобро се отсликува низ играта и резултатите. За 102 минути беше совладан Азербејџан на стартот со 3:0 (по сетови: 25:19, 25:19, 25:20), за 81 минута беше добиена Албанија во второто коло со 3:о (по сетови: 25:21, 25:16, 25:22) и за 104 минути беше архивирана и Шведска во последното коло со 3:1 (по сетови: 24:26, 25:17, 25:18, 25:18). Најмноги винери во нив запиша токму Ѓорѓиев. Играчот на полски ОНИКО од Варшава забележа вкупно 72 (22 против Азербејџан, 23 против Албанија и 27 против Шведска). Александар Љафтов и Владо Милев беа одлични на прием, Ристо Клопчевски во блокот, а меѓу поентинерите со завиден ефект, и Маџунков.
„Успешно го завршивме првиот дел од Европската лига. Настапите во Скопје се одлична основа да очекуваме идентични и на вториот турнир во Тирана каде ќе бидеме посилни и за Ѓоко Јосифов кој се врати во репрезентацијата. Задоволен сум од работата на одбојкарите во изминатиот период и овие три дена по викендот, во наша полза оди и здравствениот билтен и со голем оптимизам одиме во Албанија“, порача Драгутин Балтиќ, селектор на Македонија.
Фајналфор турнирот во Европската лига за 2017 година ќе биде во Данска на 1 и 2 јули. Натпреварите ќе се играат во Гентофте, гратче на истокот на земјата. Покрај домашната репрезентација, меѓу најдобрите четири обезбеди и Украина од групата Б, останатите две места ќе бидат пополнети по турнирот во Тирана од 23 до 25 јуни.