Сите нелогичности околу украдените пари од НЛБ Тутунска банка

Денешното соопштение на Министерството за внатрешни работи кое требаше да го расветли грабежот што од 6 април (четврток) до 10 април (понеделник) се случувал во НЛБ Тутунска банка само дополнително ја заплетка ситуацијата и отвори дополнителни прашања.

Според соопштението на МВР парите од трезорот ги извадил вработен во секторот трезорско работење и депо Бобан Смилевски.

Бобан Смилевски е приведен и судија на претходна постапка му одредил мерка притвор во траење од 30 дена.

Грабежот се одвивал од 6 до 10 април. 

  • Од првиот ден никој не забележал дека фалат пари во тезорот.

Првиот дел од парите биле украдени од пратка со милион швајцарски франци која требала да биде пратена по авион.

  • Дали и колку често фирмите праќаат милиони франци во кеш по авионски пратки?

Осомничениот два пати сам влегол во трезор и украл 375.000 евра.

  • Според безбедносните процедури за влез во трезор потребни се два клуча кои стојат кај двајца различни вработени.

Кога сфатил дека не може да ги врати парите украл уште два милиони швајцарски франци и 270.000 евра

  • По втор пат за неколку дена, вработениот сам влегол во трезорот извадил пари и ги скрил во украсна ќеса.
  •  Осомничениот е во притвор, а парите никаде ги нема.
  • Во банките има видео надзор и никој од вработените, ниту пак од обезбедувањето не забележал што се случува во банката.

Иако неколку дена никој не забележал дека фалат пари од пратките кои Тутунска банка ги праќала и од трезорот на банката, МВР успеало да обезбеди докази дека осомничениот бил свесен и имал намера да ги украде парите.

„Врз основа на издадени наредби за претрес на дом и други простории од страна на Кривичниот суд и извршени претреси на локации во Скопје, како и извршени разговори со одговорни лица во НЛБ Тутунска банка АД Скопје и други вработени лица во банката, обезбедени се писмени докази кои укажуваат на свесноста и намерата на пријавениот да го изврши кривичното дело“, пишува во соопштението на МВР.

Претседателот на Управниот одбор на Тутунска банка, денеска на прес-конференција кажа дека не може да даде повеќе одговори за ситуацијата од она што го кажале во вчерашното соопштение за јавноста.