Откако пред два МВР на својата веб-страница објави фотографија од осомничениот напаѓач на пратеникот и лидер на ЛДП, Горан Милевски, истражните органи со помош на граѓани го утврдија неговиот идентитет, а скопското Основно јавно обвинителство веќе денеска поднело обвинение против него, за кривично дело насилство.
„Денеска надлежен јавен обвинител од Основното јавно обвинителство Скопје поднесе Обвинителен предлог против едно лице за сторено кривично дело Насилство од член 386 став 3 во врска со став 1 од Кривичниот законик. На 25 март годинава, обвинетиот на плоштадот Македонија физички нападна пратеник на Собранието на Република Македонија. Идентитетот на обвинетиот беше утврден по јавување на граѓани откако по налог на Основното јавно обвинителство Скопје беше објавена неговата фотографија од страна на Министерството за внатрешни работи“, наведува Обвинителството во соопштението.
Надлежниот обвинител заедно со обвинението до судот доставил и барање на обвинетиот, чиј идентитет не се наведува, да му биде одредена мерка притвор.
Министерството за внатрешни работи во понеделникот, по консултација со Јавен обвинител, објави фотографија од осомничениот и ги повика сите граѓани кои имаат било какви сознанија за лицето да пријават во полиција или во Обвинителството.
Милевски беше физички нападнат од засега непознато лице на 25 март, додека се движел по плоштадот „Македонија“ во центарот на Скопје.
Како што тогаш изјави лидерот на ЛДП и пратеник, лицето без никаков повод и причина му се приближило и почнало да го удира со тупаници по главата.
Милевски за дел од медиумите изјави дека е можно нападот да бил поради изгласаниот Закон за употреба на јазиците и производ на манипулации врз граѓаните кои не можат да ги проценат политичките случувања во Република Македонија, како и неуспешен обид да се попречи патот на земјава кон Европската Унија и НАТО.
Инаку, ова е втор пат МВР да идентификува и да пронајде осомничен со помош на граѓани, преку објавување на фотографија на својата официјална интернет-страница. Минатата година МВР објави фотографии со замрзнати кадри од снимки од собраниските камери за време на насилствата од 27 април и побара помош од граѓаните за идентификување и пронаоѓање на лицата од снимките.