Грчката управа за безбедност и приватност на комуникациите (АДАЕ) одлучи да ги провери досиејата на телекомуникациските провајдери за барањата за надзор што ги упатуваат грчките тајни служби.
Одлуката беше донесена по извештајот на EURACTIV кој ја потресе политичката сцена на Грција откако дополнително беше откриено дека и друг политичар и новинар биле под надзор, со што се прошири листата на прислушувани политичари, новинари и други јавни личности.
Грчкото тело за заштита на приватноста ќе формира специјален тим за проверка на евиденцијата на сите телекомуникациски компании за да види дали грчките тајни служби побарале откажување од доверливоста на телефонските повици за одредени луѓе.
АДАЕ, исто така, побара од опозициските партии да дадат конкретни телефонски броеви кои треба да се проверат дали биле прислушувани, имајќи предвид дека годишно во Грција се случуваат над 15.000 активности за надзор.
Неколку извештаи во печатот во Атина сугерираа дека неколку политичари, новинари и бизнисмени биле под надзор по наредба на тајните служби.
Таканаречениот „грчки Вотергејт“ наиде на жестоки критики од меѓународните медиуми и новинарските здруженија и се смета за отворена рана на премиерот Мицотакис пред парламентарните избори што ќе се одржат за неколку месеци.
Грчката конзервативна влада на Нова демократија (ЕПП) го призна само прислушувањето на водачот на социјалистичката опозиција Никос Андрулакис, но одби да ги открие причините повикувајќи се на националната безбедност. Премиерот Киријакос Мицотакис се обиде да се огради од скандалот, велејќи дека не бил свесен за надзорот на Андрулакис.
Меѓутоа, првиот закон што го донесе како премиер беше да ги преземе тајните служби под своја контрола, а кога беше обелоденет скандалот, тој ги отпушти шефот на неговиот кабинет и неговиот внук Григорис Димитриадис, како и шефот на тајната служба.
Во средината на декември, EURACTIV ексклузивно објави дека ADAE, независна организација чија функција е предвидена во грчкиот устав, сакала да изврши ревизија во телекомуникациската компанија Cosmote по барање на европратеникот на Renew Europe, Јоргос Кирцос и истражувачкиот новинар Тасос Телоглу, кои сакале да откријат дали се прислушувани.
EURACTIV објави дека ревизијата потврдила дека и двајцата биле прислушувани од тајните служби, но причините не биле откриени, наведувајќи ја „националната безбедност“.
Извор: Еуроактив