„Јувентус ќе победи, а наградата „Златна топка“ ќе заврши кај Џиџи Буфон“. Со ваква прогноза излезе фудбалерот на Атлетико Мадрид, Антоан Гризман во пресрет на финалето во Лигата на шампиони (ЛШ) во кое „старата дама“ ќе игра против Реал Мадрид на 3 јуни во Кардиф.
Реал Мадрид стигна до големото финале токму низ двомеч против Атлетико во полуфиналето. „Кралскиот“ клуб го совлада градскиот ривал на „Сантијаго Бернабеу“ со 3:0, а тимот на Диего Симеоне возврати со 2:1 на „Висенте Калдерон“ што, сепак, беше недоволно за меч за титула по вторпат во низа.
„Финале повеќе боли од полуфинале. Размислувате како ќе подигнете пехар, а на крај може да загубите. Тоа е тешко“, вели напаѓачот на Атлетико Мадрид за кого Жозе Мурињо нема да штеди пари да го доведе во Манчестер јунајтед во летниот период.
Атлетико Мадрид ќе биде дел од шампионската Лига на УЕФА и во наредната сезона. На коло до крајот во Примера е на третото место и во последниот дуел во недела ќе игра против Атлетик Билбао на домашен терен.