Екс премиерот Никола Груевски денеска ќе биде повикан на распит во Кривичниот суд во Скопје. Освен лидерот на ВМРО-ДПМНЕ, исказ во судот треба да дадат и поранешниот министер за транспорт и врски Миле Јанакиески, како и градоначалникот на општина Гази Баба Тони Трајковски. Сите тие се осомничени во случајот што го отвори Специјалното јавно обвинителство под кодно име Т.Н.Т., односно предметот за уривањето на комплексот Космос на Фиат Цаноски.
Од Судот денеска испратија соопштение во кое се вели:
„Сите предлози се распоредени кај судии на претходна постапка кои во текот на денешниот ден ќе постапуваат по наведените предлози, а лицата ќе бидат повикани веднаш да се јават во судот. Со оглед дека лицата за кои од СЈО е предложена мерка притвор не се обезбедени на друг начин, судот ќе ги примени одредбите од ЗКП, а согласно досегашната пракса на постапување по предмети во изминатиот период.“
Од судот не можат да потврдат дали повиканите ќе се јават веднаш кај судија на претходна постапка или тоа ќе го сторат во наредните денови. Понатаму се зависи од обвинителот кому му е доделен случајот, дали ќе побара стражарно приведување и асистенција од полицијата осомничениот да биде донесен во судот.
Од Основниот суд Скопје 1, потврдија дека СЈО поднело барање за определување мерка притвор за директорот на Петта управа Горан Грујевски осомничен во случајот Тврдина, како и за градоначалникот на Битола Владимир Талевски, кој се сомничи за финансиски злоупотреби во предметот Транспортер.
За останатите во текот на вчерашниот ден беа доставени предлози за определување мерки за обезбедување присуство. Односно тоа значи дека СЈО бара на осомничените да им биде одземен пасошот, да им се ограничи движењето или да имаат обврска да се јавуваат во Судот. Таква мерка е побарана за Никола Груевски, Миле Јанакиески, Тони Трајковски, потоа за четворица осомничени во случајот Тврдина и шест лица кои се осомничени во случајот Тортура, за апсењето на Љубе Бошкоски. Меѓу нив е и Ивица Анчевски-Пуки, командантот на единицата АЛФИ во МВР.