Претседателот на ВМРО-ДПМНЕ, Никола Груевски, се очекува вечерва по 23 часот да се обрати од собраниската говорница. Тоа ќе биде последен негов говор од позиција на власт, а по изгласувањето на новата Влада некаде околу полноќ, Груевски по 11 години заминува во опозиција.
Во Парламентот веќе втор ден има расправа за програмата и составот на новата влада на мандатарот Зоран Заев. За да се изгласа новиот владин кабинет потребни се 61 глас.
Инаку, во законодавниот дом денеска беа изгласани и претседателот, негов заменик и членови на Комисијата за избори и именувања, со што се заврши конститутивната седница 5 месеци откако беше почната.
ВМРО-ДПМНЕ има 6 члена во неа меѓу кои и претседателот на комисијата Илија Димовски, 5 члена има СДСМ и по еден имаат ДУИ и Беса. Исто така изгласана беше и иницијативата на пратениците Мисовски, Алими, и Димовски за работните тела. Веќе за утре е најавена и нова седница на која меѓу точките на дневен ред се екстерното и изборниот законик.