Лидерот на ВМРО ДПМНЕ Никола Груевски денеска во Штип каде оваа партија одржа свечена академија по повод 23 Октомври- Денот на македонската револуционерна борба, обвини дека оваа година, за првпат по 10 години, власта е незаинтересирана за одбележување на овој празник.
-Затоа, сме ние тука. Кога оваа власт се срами и се плаши од овој голем ден и празник, тука сме ние, ВМРО-ДПМНЕ да го одбележиме, прославиме, да се потсетиме и инспирираме од минатото, македонското револуционерно минато за слободата на Македонија, рече Груевски.
Но, истовремено со одржувањето на оваа академија, во Скопје Владата го одбележа овој државен празник, што беше воведен од претходната Влада, како ден кога е основано ВМРО.
-Делегација на Владата на Република Македонија на чело со министерот за култура Роберт Алаѓозовски, во придружба на министерот без ресор задолжен за регулатива за подобрување на инвестициската клима за домашните претпријатија Зоран Шапуриќ, заменик министерот за информатичко општество и администрација Александар Бајдевски, и заменик министерот за локална самоуправа Дејан Павлески, по повод празникот „Ден на македонската револуционерна борба – 23 октомври“, денеска положи венци со свежо цвеќе на споменикот на Гоце Делчев во Градски Парк во Скопје, се вели во соопштението од владината прес служба.
Венци со свежо цвеќе на споменикот на Гоце Делчев положија и делегации на Собранието на Република Македонија, на Претседателот на Република Македонија, на АРМ, на Сојузот на борците на Република Македонија, на политичките партии и на дипломатскиот кор во земјата.
-Владата на Република Македонија им го честита на граѓаните празникот „Ден на македонската револуционерна борба – 23 октомври“, кој обврзува заеднички да креираме услови за стабилност и за подобар живот во нашата држава, се вели во соопштението.