Генералниот секретар на Обединетите Нации (ОН), Антонио Гутереш денеска предупреди на хуманитарна катастрофа во Авганистан и побара помош и солидарност од меѓународната заедница.
Во Авганистан се наѕира хуманитарна катастрофа. Речиси пола од населението има потреба од хуманитарна помош. Секој трет човек не знае од каде ќе го добие наредниот оброк. Сега повеќе од кога и да е, на авганистанските деца, жени и мажи им е потребна поддршка и солидарност од меѓународната заедница, напиша денеска на Твитер генералниот секретар на Светската организација.
Обединетите Нации претходно објавија дека над 18 милиони луѓе, околу пола од авганистанското население, бараат помош и дека пола од сите авганистански деца до петгодишна возраст веќе страдаат од акутна неухранетост поради втората суша во четири години. Ситуацијата сега дополнително се компликува, откако талибанците ја презедоа контролата во Авганистан, со оглед на тоа дека американските санкции против талибанците може да ја забрзаат хуманитарната криза во земјата која во голема мера се потпира на странска помош.