Шефот на британската дипломатија, Филип Хамонд во изјава во однос на политичката криза во земјава, вели Македонија назадува изминатава година а со цел членување во ЕУ и НАТО неопходни се исполнувања на неколку стандарди.
– За земја каква што е Македонија, чија траекторија се Европа и НАТО, јасни се стандардите кои сите очекуваме да бидат сериозно разгледани. Во сите земји-апликанти очекуваме постепено подобрување, вели Хамонд.
Според него, загрозен е евроатлантскиот пат на земјава доколку кризата продолжи да назадува.
– Во случајот со Македонија изминативе девет месеци или повеќе, гледавме назадување. Ние треба да бидеме јасни и искрени со Македонците дека ако продолжиме да ја гледаме истата ситуација, тие нема да напредуваат во соработката со ЕУ и НАТО. Мора да го променат ваквиот тренд и да се вратат на вистинскиот пат, инаку сите бенефиции од ЕУ и НАТО ќе ги загубат, предупреди британскиот министер.
Ваквите предупредувања во однос на политичката криза, не се нешто ново кога се работи за меѓународната заедница. Македонскиот претседател Ѓорѓе Иванов е постојана мета на критика како од домашната така и од меѓународната јавност поради скандалозната аболиција на 56 луѓе за која рече дека е многу важна за смирување на тензиите пред изборите на 5.јуни.
Во меѓувреме, пратениците на ДУИ и ВМРО-ДПМНЕ без присуство на опозицијата изгласаа селективна аболиција во Парламентот, а воедно и откажувајќи ги изборите за 5.јуни.
Селективната аболиција пак, предупредуваа меѓународните претставници и опозицијата, само ќе ја влоши кризата во Македонија.