Стартот на преговори за членство во ЕУ бара враќање на позитивната препорака на Европската комисија (ЕК) и согласност на сите 28 земји членки на ЕУ, изјави комесарот за проширување Јоханес Хан по средбата со премиерот Зоран Заев. И додаде дека е потребен и национален конзесуз за ЕУ интеграција и работа со опозицијата врз реформите.
Хан има искрена намера, како што рече, да даде се од себе за да и помогне на Македонија на овој пат па најави дека ќе допатува во Скопје на 26 јуни. Но очекува од Македонија да покаже и докаже дека спроведува реформи кои се неопходни на патот кон ЕУ.
“Само така можат да се тргнат нашите резерви кон препораката”, рече Хан.
Хан и Заев разговарале и за реформи и мерки што веќе се преземени и за добрососедските односи. Односи кои за Хан се “клучни”.
“Охрабрен сум од овие први чекори. Разговаравме за најитните чекори и го уверив премиерот дека ЕК е спремна да помогне колку што може”, рече Хан повторувајќи дека Рајнхард Прибе доаѓа во Скопје веќе оваа недела за да се тргне во системски реформи за владеење на правото.
“Ова не го правите за да го задоволите комесарот или ЕУ туку заради граѓаните”, подвлече тој.
Конечно, рече Хан, “потребно е да се најде решение за спорот со името и да се најде начин како да се оди напред а тоа е базирано на заедничка доверба и затоа е толку потребно да се создадат и персонални односи” со лидерите на првите соседи.
“Ако влегуваме со отвореност во ова прашање тоа треба да биде можно. Ако има волја секогаш има пат напред и на тоа треба да се работи, на приближување на различните ставови. Потребно е конечно решение кое е прифатливо за сите”, рече Хан.
Премиерот е задоволен од средбата, како што рече самиот “со мојот драг пријател комесарот Хан”. И додаде дека “сега ни треба поддршка повеќе од кога било во смисла на сигнали и придвижувања во однос на интеграција во ЕУ”.
И повтори дека овој месец ќе оди во Софија а шефот на дипломатијата во среда оди за Атина. Цел на овие средби е “како да се изградат мостови на соработка и поддршка”, вели Заев.
Заев јасно ставил на знаење дека приоритет на оваа влада е ЕУ интеграцијата:
“За нас членство во ЕУ нема алтернатива”, рече Заев и додаде дека Македонија е кандидат за членство во 2005 година и “верувам дека ќе се согласите со мене дека е крајно време овој процес да се придвижи нанапред”.
За него е сосема јасно дека од Македонија се очекуваат реформи и тоа пред се во судството, владеење на правото и реформи во јавната адмнистрација бидејќи само така може да се врати позитивната препорака и тоа прва работа што треба да се направи.
За новиот премиер, “ако се има добар и пријателски однос може да се најде решение за се”. Тој најави креирање на позитивен амбиент со Грција.
Заев испрати порака и до опозицијата велејќи дека е потребна заедничка работа на патот кон ЕУ а успехот ќе биде заеднички а не само на владата.
Заев рече исто така дека Македонија понудила Скопје да стане седиште на регионалната заедница за транспортна соработка која е во формирање и која беше договорена во Сараево на последниот состанок на регионот.