Хрватска, која претседава со Европската Унија (ЕУ), е во исчекување на преговарачката рамка на Европската Комисија (ЕК) со Северна Македонија по што прашањето ќе може да се стави на дневен ред пред министрите и да се одлучи за отворањето на првите поглавја. На видео-конференција со новинарите по средба на министрите за европски прашања на ЕУ, хрватската државна секретарка за ЕУ, Андреја Метелко-Згомбиќ порача дека е веќе „голема работа што е донесена одлуката за отворање на преговорите за членство со Северна Македонија и Албанија“ минатиот месец.
„Согласно таа одлука, сега е прво на Европската Комисија да ја подготви преговарачката рамка и уверена сум дека внимателно работат на тоа. Еднаш кога ќе биде подготвена оваа рамка, министрите со задоволство ќе разговараат за неа и тогаш ќе знаеме кои се следните чекори“, изјави Метелко-Згомбиќ за МИА.
Преговарачката рамка што ја подготвува ЕК се главните теми и принципи врз кои ќе се темели преговарачкиот процес и документот мора да биде одобрен од сите земји членки на ЕУ. Земјата кандидат треба да подготви своја преговарачка рамка.
Хрватската државна секретарка не беше во можност да каже кога може да се очекува прашањето да дојде на дневен ред, поради тоа што кризата со коронавирусот целосно ја измени агендата на ЕУ институциите. Но, од ЕК потврдија дека и покрај ова тие работат на подготовка на рамката за преговори.
Метелко-Згомбиќ информираше дека вчера се одржал и разговор помеѓу хрватскиот премиер Андреј Пленковиќ и претседателот на Европскиот Совет, Шарл Мишел, на кој станало збор за организирањето на самитот ЕУ – Западен Балкан кој, исто така, е одложен поради кризата.
„Рано е да се каже кога ќе може да се организира Самитот, но ги вложуваме сите наши напори за да обезбедиме средба на највисоко ниво за време на нашето претседателство“, изјави Метелко-Згомбиќ, односно пред први јули кога завршува хрватското претседавање со Унијата.
Еврокомесарот за интеринституционални прашања, Марош Шевчович додаде дека е важно земјите и граѓаните на Западен Балкан да знаат дека ЕУ е целосно фокусирана на вклучување на регионот во сите иницијативи поврзани со справувањето со коронавирусот.
„Сакам да ги уверам нашите пријатели на Западен Балкан дека кога ги развиваме нашите политики за закрепнување на економијата, ќе ги имаме на ум и ќе се обидеме да ги вклучиме колку што е можно повеќе“, изјави еврокомесарот.