Пратеникот од БЕСА Африм Гаши во гостувањето во Топ Тема вчеравечер негираше дека БЕСА ги повлекла потписите за поддршка на новата влада.
-Не сме донеле одлука дали ќе влеземе во влада. Разговаравме само за избор на претседател на Собранието. Ние не ги повлекуваме потписите, ќе го помогнеме процесот колку што можеме, рече Гаши.
Според него , ирационално е да се помисли дека би коалицирале со ВМРО-ДПМНЕ.
-Ние сакаме нова, реформска влада, СЈО да проработи, сакаме Специјален суд. БЕСА гледа процес кој е добар за граѓаните и помага на тој процес. Сметаме дека Груевски не е добро да биде повторно премиер, рече Гаши.
Гаши исто така рече дека не го спречуваат процесот за избор на претседател на Собрание и дека тој може да се избере и без нив, туку само сакаат да укажат дека на ваков начин и со условувања таквата влада нема да биде реформска.
Дека БЕСА останува во новото парламентарно мнозиство потврди и генералниот секретар на СДСМ Оливер Спасовски, во вчерашното гостување на 24 Анализа на ТВ 24.
И Гаши и Спасовски реагираа на изјавата на портпаролот на ДУИ Артан Груби дека БЕСА не го подджала кандидатот за спикер на Собранието Талат Џафери и се повлекла од идната коалиција.
Тој, пред вчерашното Централно претседателство на ДУИ, на кое меѓудругото се разговарало и за ова, посочи дека однесувањето на БЕСА е неприфатливо и постојат недоразбирања што може да ја наруши коалицијата.
Сепак, Спасовски вели дека за ваквите изјави треба да се бара одговор од самиот Груби.
Спасовски исто така рече дека нема да има нови избори и дека нема откажување од формирање на институциите од страна СДСМ и парламентарното мнозинство.
Истакна дека се разгледуваат различни стратегии, за кои не сакаше да говори во јавноста, но дека нема откажувања ниту од ДУИ, ниту од Беса и Алијансата на Албанците.
Цврсто сме решени за смена на Никола Груевски и мирна транзиција на власта“, рече Спасовски.