До промоцијата на новиот европски женски ракометен првак нè делат уште четири меча. И додека екипите ги прават последните подготовки за утрешните полуфинални мечеви во „Ласло Пап арена“ во Будимпешта, причина за задоволство веќе имаат девет девојки и тренер кои влегоа во Ол-стар тимот на сезоната за групната фаза во Лигата на шампиони.

Меѓу нив и една вардарка. Драгана Цвијиќ доби најмногу гласови за позицијата кружен напаѓач во изборот во кој учествуваа илјадници фанови и спортски новинари од 12 земји. Во номинациите беа вклучени уште три нејзини колешки во црвено-црниот дрес и тоа за позициите најдобар голман (Амандин Лејно), лев бек (Андреа Пенезиќ) и десен бек (Александра Лакрабер), но најдебело гласачко конто, редоследно, на крајот има Норвежанката Кари Алвик Гримсбо (Ѓер), Романката Кристина Неагу (ЧСМ Букурешт) и Словенката Ана Грос (Мец).

Во игра за Ол-стар статус беше и Ирина Дибирова меѓутоа на клупата на тимот ѕвездички заврши Мартин Амброш од Ѓер.

Ол-стар тим на групната фаза во Лигата на шампиони за сезоната 2017/18

Голман: Кари Алвик Гримсбо (Норвешка) – Ѓер

Лево крило: Сираба Дембеле (Франција) – Ростов

Лев бек: Кристина Неагу (Романија) – ЧСМ Букурешт

Среден бек: Вероника Кристијансен (Норвешка) – Митјиланд

Кружен напаѓач: Драган Цвијиќ (Србија) – ЖРК Вардар

Десен бек: Ана Грос (Словенија) – Мец

Десно крило: Јулија Манагарова (Русија) – Ростов

Најдобар дефанзивец: Жужана Томори (Унгарија) – Ѓер

Најдобра млада ракометарка: Тјаша Станко (Словенија) – Крим Меркатор

Тренер: Мартин Амброш (Шпанија) – Ѓер