Вардар имаше шанси, но не и реализација за разлика од Македонија Ѓ.П. која славеше со 2:0 во последниот меч од првото коло во новиот македонски фудбалски шампионат. Ветеранот Боби Божиновски, по асистенција на Бенјамин Демир, погоди во 21 минута, а трите бода за ѓорчепетровци ги осигура Сефер Емини во 89. минута.
„Црвено-црните“ одиграа во рамки на можностите на подмладениот и неосвежен ростер со оглед на забраната за трансфери за два преодни рока што најтрофејниот македонски клуб ја доби поради финансиските проблеми во кои западна во минатата сезона. Тоа резултира и со недобивање на лиценца за настап во квалификациите за Лига Европа иако обезбеди право на учество како вицепрвак.
Промашувањата на вардарци беа особено присутни во првото полувреме што го завршија со четири шанси за гол и погодена статива, но мрежата на Марко Јовановски остана мирна на тренинг комплексот „Петар Милошевски“ против Фудбалската федерација на Македонија (ФФМ). Шанса за поправен и први бодови, Вардар ќе бара наредниот викенд во Велес против Борец.
Со пораз во новата сезона влезе и бранителот на титулата, Шкендија. Академија Пандев ги совлада тетовци со 1:0 со одличниот погодок на Сашко Пандев од слободен удар во 55. минута. Еден гол ` беше доволен и на Ренова за триумф на домашен терен против Силекс, Шкупи со 2:0 го порази Борец додека Струга Трим Лум со 2:1 беше подобра од Работнички.
Прва фудбалска лига, 1 коло
Вардар – Македонија Ѓ.П. 0:2
Академија Пандев – Шкендија 1:0
Шкупи – Борец 2:0
Струга Трим Лум – Работнички 2:1
Ренова – Силекс 1:0
Двојки за 2 коло
Борец – Вардар
Силекс – Шкендија
Работнички – Шкупи
Македонија Ѓ.П. – Академија Пандев
Ренова – Струга Трим Лум