Помалку заразени и починати од ковид-19 во земјата биле пријавени во периодот од 7. до 13. февруари годинава во однос на претходната недела, а само кај тинејџерите е забележан пораст на бројот на позитивни, покажува најновиот извештај на Институтот за јавно здравје (ИЈЗ).

Регистрирани сe 8.638 нови позитивни случаи од 35 градови во државата, со намалување од 13,4% во однос на минатата недела (n=9.977). Процентот на позитивност се движи од 27,2% до 37,4%, просечно 32,2%. Најголем дел од регистрираните случаи се од Скопје (n=4.838; 56,0%), а највисока неделна инциденца е регистрирана во Кавадарци 837,8,1/100.000.

Тестирани се вкупно 26.360 материјали во лабораториите, со намалување за околу една петина (21,1%) во oднос на минатата недела.

Пријавени се 124 смртни случаи во 23 градови во текот на изминатата недела, за 32,6% помалку во однос на претходната недела.

Тинејџерите и децата повеќе се инфицирале со ковид-19    

Регистрирани се заболени лица во сите возрасни групи. Најзастапени се лицата на возраст над 60г (n=2.052, 23,8%) и 40-49г (n=1.629, 18,9%). Најмал број е регистриран кај возрасната група од 0-9г (n=434; 5,0%). Во однос на претходната недела, се забележи намалување на бројот на заболени кај возрасните групи над 20 години, со најзабележително намалување од 31,5% во возрасната група од 20-29г.

Во однос на претходната недела, се забележува зголемување кај возрасните групи од 0-9г и од 10-19г, за 39,5% и 47,6%, соодветно. Во однос на дистрибуцијата по пол, пријавени се 4.711 (54,5%) лица од женски и 3.927 (45,5%) од машки пол.

„Оздравени“ речиси 10.000 лица, повторно се инфицирале 1.236 граѓани, а шестмина по третпат

Согласно новиот алгоритам за оздравување во текот на минатата недела со статус „оздравени“ се стекнале 9.900 лица во хоспитализирани услови или на домашно лекување.

Во текот на минатата недела вкупно се пријавени 1.236 реинфекции (од кои 6 се втори реинфекции), со намалување за 7,8% во однос на претходната недела.

Смртни случаи, вкупно 124, се пријавени во 23 градови во текот на изминатата недела,  што е за 32,6% помалку во однос на минатата недела. Најголем дел од нив се од Скопје (49). Во однос на возраста, најголем број (n=121; 97,6%) од починатите припаѓаат на возрасната група над 60 години.

(Љ.Б.)