Стапија на сила одлуките на Владата за преименување на автопатот Е-75 и аеродромот во Петровец. Тоа значи дека сообраќајните табли долж автопатот со името „Александар Македонски“ ќе бидат променети со табли со новото име „Пријателство“.
По објавувањето на одлуките во „Службен весник“ аеродромот го носи името Меѓународен аеродром Скопје или на англиски International airport Skopje.
Одлуката за преименување на автопатот и на аеродромот беше донесена на седница на Владата минатата недела.
Промената на имињата на автопатот и на аеродромот, како што објави премиерот Зоран Заев по средбата во Давос со неговиот грчки колега Алексис Ципрас, е во знак на добра волја и зацврстување на односите со Грција во време кога се интензивираат преговорите за името.
Автопатот досега го носеше името „Александар Македонски“ по одлуката да се именува така во јули 2008 година.