Деловната клима во Германија потона на најниско ниво од 2009 година, соопшти денеска економскиот институт ИФО и предупреди на остар пад на активностите во најголемата економија во Европа како последица на пандемијата на коронавирусот.

Резултатите од истражувањето за март покажуваат дека индексот на деловната клима паднал скоро 10 поени во март во однос на февруари на 86,1 поени, објави ИФО.

„Ова е најголем пад од германското обединување и најниската вредност на индексот од јули 2009 година. Германската економија е во шок“, изјави претседателот на ИФО, Клименс Фојст.

Во услужниот сектор, индексот на деловна клима забележа најголем пад, откако ИФО почна да собира податоци во 2005 година, а индексот во индустријата е на најниско ниво од август во 2009 година.

Германската економија може да се намали од пет на 20 проценти оваа година, во зависност од времетраењето на блокадата предизвикана од пандемијата, рече економистот на ИФО, Клаус Вохлабе и додаде дека во секој случај очекува сериозна рецесија што ќе трае најмалку два квартала.