Без промени на врвот на табелата во прволигашката конкуренција по мечевите од 15 рунда. Водечките „црвено-црни“ запишаа нови победи и останаа на исто растојание како и пред денешните настапи во Кратово, односно, Тетово. Шкендија со 2:0 славеше над Силекс, а Вардар со 5:2 триумфира против Ренова.
Стрелци за тетовци беа Бразилецот Жуниор во 50 минута и репрезентативниот напаѓач Бесарт Ибраими во 74 минута. Голеадата за вардарци, пак, под Шара ја почна Велија со автогол во петтата минута по што до паузата погодија уште Блажевски од пенал во 13 минута, Максимов во 30 минута и Фелипе во 45 минута. Печат на трите бода за тимот на Чедомир Јаневски стави Итало во 90 минута. Двете реализации за домашните беа дело на Арѓент Гафури во 26 минута и во 32.
Седум гола видоа и гледачите во Битола, но незадоволни го напуштија стадионот „Под Тумбе кафе“. Академија Пандев ги понесе бодовите за Струмица по триумфот над „зелените“ со 4:3. Половина од головите за гостите ги постигна Балдовалиев во 34 минута и во 47, Вареловски „стрелаше“ во 18., а Стоилов во 52 минута. По еден за поразената екипа запишаа Трифуновски (шеста минута), Попзлатанов во 56. и Ковачев во 82.
Ефикасни беа и фудбалерите на Работнички. „Црвените“ од Градски парк ја совладаа Победа со 4:0 со два гола на Џефри Чинеду во 30 минута и во 56. и по еден на Маркоски во четвртата минута и на Сержињо во 74.
Прволигашки фудбал попладнево немаше единствено на Железарница (Скопје – Шкупи) поради лошата состојба на теренот по обилните врнежи од дожд.
Прва лига, 15. коло
Резултати
Силекс – Шкендија 0:2
Ренова – Вардар 2:5
Пелистер – Академија Пандев 3:4
Работнички – Победа 4:0
Обилните врнежи од дожд го одложија мечот меѓу Скопје и Шкупи
Табела: Шкендија 37, Вардар 26 (-2), Академија Пандев 24 (-1), Силекс 22, Работнички 19 (-1), Ренова 17, Пелистер 15, Шкупи 15 (-1), Победа 15, Скопје 9 (-1).
Идно коло (19.11.2017 год.): Шкендија – Скопје, Вардар – Пелистер, Академија Пандев – Работнички, Победа – Силекс, Шкупи – Ренова