Историска одлука на Европската фудбалска асоцијација (УЕФА) во пресрет на Суперкупот меѓу Челзи и Ливерпул на 14 август во Истанбул. За главен судија на мечот на „Водафон арена“ е делегирана Французинката Стефани Фрапар која ќе биде прва жена што ќе дели правда во финални мечеви на УЕФА.
Дел од судискиот колегиум за Суперкупот, во улога на асистентки, ќе бидат сонародничката Мануела Николоси и Мишел О’Нил од Република Ирска, а за четврти судија е назначен Турчинот Ченејт Чакир.
Фрапар во јули го судеше финалето на женското СП во Франција меѓу Холандија и САД. Три месеци претходно беше на центар на тревник и во натпреварот меѓу Амиен и Стразбур како првата жена што доби доверба да суди меч во Лига 1 во која ќе остане на листата на главни судии за претстојната сезона.
Прва жена што судела во УЕФА натпревари е Швајцарката Никол Петињо која беше главна во три меча во Лига Европа во периодот од 2004 година до 2009 година, но никогаш не делеше правда во меч за УЕФА титула во машка конкуренција.