Ракометарите на Вардар ги делат неколку часа пред новата прилика за историја. По дофатот на Фајналфор турнирот во Келн, синоќа, преку големата Барселона, се пласираа во финале во Лигата на шампиони (ЛШ), а попладнево (18 ч.) против ПСЖ ќе атакуваат и на тронот. Едночасовниот судир во „Ланксес арена“ ќе покаже дали „црвено-црните“ ќе бидат само втори дебитанти со престижниот трофеј, по Фленсбург во 2014 година, или парижани ќе бидат само втор француски претставник на кои им успеало тоа по Монпелје во 2003 година.

„Ќе се придржуваме до истиот рецепт како и за полуфиналето. Играта во дефанзива и одбрана на голот“, порачува капитенот на Вардар, Стојанче Стоилов.

Мотив за успех на колективот пред се, но и личен, е силно вграден и кај Иван Чупиќ. Хрватот пристигна во Скопје како титулар со Кјелце од ланската сезона во ЛШ, сега има шанса за нова радост со македонскиот првак. Алекс Душебаев, пак, освен што сака да се збогува со вардарци на најубав можен начин, ќе се обиде да ја продолжи и семејната успешност во финалните натпревари по минатогодишниот подвиг на Кјелце предводен од неговиот татко, Талант.

„Дваесет часа не е доволно време за одмор и за мирни и нормални подготовки. Затоа ќе мора да се бориме, бориме и бориме“, коментира Лука Циндриќ кој со проектот во последната минута во вчерашното полуфинале ги дигна на нозе вардаровите навивачи во Келн и ја „запали“ целокупната македонска јавност што пулсираше со нив преку малите екрани.

Вардар и ПСЖ се пласираа во денешното финале со победи со гол разлика во полуфиналните среби. „Црвено-црните“ славеа на Барселона со 26:25, Французите беа подобри од Веспрем со 27:26.

Доколку четата на Раул Гонзалез успее да го прегрми и скапиот ривал од Градот на светлината, Македонија ќе биде шестата држава со европски машки ракометен шампион по Шпанија, Германија, Франција, Словенија и Полска. Промоцијата на 13 различен освојувач на натпреварувањето во историјата и шести различен во последните шест години се очекува околу 20 часот.

Досегашни финални мечеви во ракометната Лига на шампион на ЕХФ

2015/16: Кјелце – Веспрем 39:38 по изведување на пенали (29:29 во основните 60 минути, 6:6 во продолженија, 4:3 во ударите од седум метри)

2014/15: Барселона – Веспрем 28:23

2013/14: Фленсбург – Кил 30:28

2012/13: Хамбург – Барселона 30:29

2011/12: Кил – Атлетико Мадрид 26:21

2010/11: Барселона – Сиудад Реал 27:24

2009/10: Кил – Барселона 36:34

2008/09: Сиудад Реал – Кил 67:66 (прв меч 39:34/реванш 33:27)

2007/08: Сиудад Реал – Кил 58:54 (27:29/31:25)

2006/07: Кил – Фленсбург 57:55 (28:28/29:27)

2005/06: Сиудад Реал – Портланд Сан Антонио 62:47 (25:19/37:28)

2004/05: Барселона – Сиудад Реал 56:55 (27:28/29:27)

2003/04: Целје – Фленсбург 62:58 (34:28/28:30)

2002/03: Монпелје – Портланд Сан Антонио 50:46 (19:27/31:19)

2001/02: Магдебург – Веспрем 51:48 (21:23/30:25)

2000/01: Портланд Сан Антонио – Барселона 52:49 (30:24/22:25)

1999/00: Барселона – Кил 54:52 (25:28/29:24)

1998/99: Барселона – Загреб 50:41 (22:22/28:19)

1997/98: Барселона – Загреб 56:40 (28:18/28:22)

1996/97: Барселона – Загреб 61:45 (31:22/30:23)

1995/96: Барселона – Елгоријага Бидасоа 46:38 (23:15/23:23)

1994/95: Елгоријага Бидасоа – Загреб 56:47 (30:20/26:27)

1993/94: ТЕКА Сантандер – Брага 45:43 (22:22/23:21)