Осумдесет од вкупно 81 градоначалник користат Фејсбук во својата работа, покажа Анализата направена од тим специјалисти за социјални медиуми, во периодот помеѓу 4 и 15 декември 2017 година.
Втор на листата на „омилени“ социјални медиуми кои ги користат градоначалниците е Инстаграм. Неспоредливо со Фејсбук, но свој профил на овој социјален медиум имаат 21 градоначалник. Бројката драстично се намалува кај Твитер, па овој социјален медиум активно го користат само 5 од вкупниот број на 81 градоначалник.
-Ова е многу висок процент на градоначалници кои се активни на социјалните медиуми со цел да ги информираат граѓаните за својата работа во општините. Тоа што недостасува кај поголемиот дел од нив е да бидат секојдневно присутни онлајн, но не само за да се претстават, туку да го слушнат мислењето, критиките и предлозите кои доаѓаат преку социјалните медиуми. Разликата во бројот на градоначалници кои користат Фејсбук споредено со Инстаграм веројатно се должи на недостатокот на професионални лица и тимови за социјални медиуми кои секоја општина треба да ги има. Активното користење на Твитер од само пет градоначалници можеме да го толкуваме како недостаток на ресурси, но пред сè и како избегнување на оваа публика која важи за најкритизерска. Ова не е добро и мора да се промени, вели Бојан Кордалов, специјалист за нови медиуми и односи со јавноста и автор на оваа анализа.
Анализата покажува и дека само тројца градоначалници истовремено користат Фејсбук, Твитер и Инстаграм во својата работа, а само еден градоначалник воопшто не ги користи социјалните медиуми.
Сепак, градоначалниците се поактивни на Фејсбук од пратениците и министрите. Анализата од март годинава покажа дека 110 од вкупно 120 пратеници користат Фејсбук, додека слично истражување објавено во јуни годинава покажа дека 20 од вкупно 26 министри се редовно активни на овој социјален медиуми.
Авторот на анализата додава дека користењето на социјалните медиуми од страна на градоначалниците не е веќе прашање на избор, туку потреба и нивна општествена одговорност кон граѓаните на нивната општина.