Италија го одбра наследникот на Џанпјеро Вентура. Кормилото на фудбалската репрезентација му е доверено на Роберто Манчини чија цел ќе биде враќање на „аѕурите“ на старите патеки што во превод значи пласман на Европското првенство во 2020 година.
Манчини им кажа „да“ на челните луѓе на Фудбалскиот сојуз на Италија, а официјална промоција на новата функција ќе има по завршување на сезоната со Зенит од Санкт Петербург, јавува „Скај Италија“. Пред работата во рускиот премиерлигаш, тој ги водеше и екипите на Фиорентина, на Лацио, во два мандата Интер, Манчестер сити и Галатасарај.
Италијанската фудбалска репрезентација е без селектор од декември во минатата година. Причина за разделбата со Џанпјеро Вентура беше неуспешната кампања за претстојното Светско првенство во Русија. „Аѕурите“ во бараж двомечот беа елиминирани од Шведска и за првпат по 66 години останаа без учество на мундијал.