Италијанскиот скулптор Силвио Газанига почина денеска во 96 година од животот. Зад себе остави бесмртно дело – пехарот наменет за најдобрата репрезентација на светските фудбалски првенства. Креираше дело што победи на конкурсот на ФИФА во далечната 1971 година на кој учествуваа 53 идејни решенија. Прв што го подигна беше Франц Бекенбауер по победата на, тогаш, Западна Германија на мундијалот во 1974 година.

Оттогаш трофејот завршуваше во многу раце. Го подигнуваа тренери, селектори, службени лица на делегации, но честа при примопредавање први ја имаат капитените. По германската фудбалска легенда завршуваше и кај Аргентинецот Даниел Пасарела, кај Италијанецот Дино Ѕоф, се редеа Лотар Матеус, Дунга, Дидие Дешамп, Кафу, Фабио Канаваро, Касилјас, а последен со лента на рака на кого му беше врачен е Филип Лам на СП 2014 во Бразил.

Во 1971 година ФИФА беше принудена да распише конкурс за нов пехар како замена за стариот на Жил Риме бидејќи Бразил го доби во трајна сопственост. Идејата на Газанига за производ што одразува човечка фигура како ја држи земјината топка беше победничка и доби најмногу гласови покрај останатите 52 предлога.

Пехарот е изработен од 18 каратно злато. Тежи шест килограми и набрзо стана симбол на највозбудливото натпреварување во фудбалската игра, неоткинлив дел од нејзината историја и, за многумина, најубав во лепезата на спортови што се присутни во секојдневието.