Италијанската Влада денеска прогласи вонредна состојба во земјата поради коронавирусот. Пратениците ја донесоа одлуката откако се потврдени првите два случаи на зараза со коронавирус во Италија.
Премиерот Џузепе Конте синоќа објави дека двајца кинески туристи кои престојуваат во Италија се заразени со вирусот, додавајќи дека Владата донела одлука да го прекине воздушниот сообраќај со Кина.
Италијанското цивилно воздухопловство денеска соопшти дека на барање на здравствените служби сите летови меѓу Кина и Италија се прекинати до натамошно известување.
СЗО го прогласи корона вирусот за светска здравствена закана поради брзото ширење на вирусот и во други земји, не само во Кина.
Организацијата ги повика сите земји да ги спроведат одлуките засновани врз докази и да ги применуваат препорачаните мерки. Во исто време, СЗО изрази загриженост за земјите со послаби здравствени системи и најави дека ќе даде поддршка за овие земји да се подготват да се справат со вирусот. Опасноста од коронавирусот, всушност е потенцијалното ширење на бројот на инфицирани луѓе во државите со послаби здравствени системи.
СЗО е подготвена да даде поддршка и совети за секоја земја која размислува кои мерки да ги преземе, беше кажано на прес конференцијата во Женева.