Исламската верска заедница (ИВЗ) писмено ги информирала Владата и Комисијата за заразни болести дека нема да почитува евентуален полициски час за време на големиот муслимански празник Рамазан Бајрам.
Писмото на ИВЗ било испратено до двете споменати адреси на 18 мај и во него ги информира дека ниту ќе ги затвори џамиите, ниту ќе се откаже од молитвите. Но, притоа се наведува дека ќе бидат почитувани препораките за физичка дистанца и носење на заштитна маска.
Преку својот Фејсбук профил се јави и Реисот Сулејман Реџепи кој нагласи дека „евентуален полициски час ќе значи губење на довербата во компетентните органи на сите верници од муслиманска вероисповед“.
„Ако се воведе полициски час за целиот викенд, тогаш вие, како компетентни органи, ќе ја загубите довербата кај сите верници од исламската вероисповед. Имајќи предвид дека нашата земја се наоѓа пред одржување на парламентарни избори, ние како верска институција постоиме за да им служиме на верниците и нема да носиме товар на грб за откажување на намазот на Фитер Бајрам во џамија. Ви гарантираме дека во текот на намазот, ќе ги почитуваме сите препораки кои се имплементират и при извршување на дневните намази за кои досега не сме добиле никаква забелешка од ваша страна“ напиша Реџепи на Фејсбук.
Неговиот пост доаѓа по најавата на министерот за здравство, Венко Филипче дека Комисијата за заразни болести предлага мерката „полициски час“ за претстојниот продолжен викенд, кога покрај Рамазан Бајрам, се празнува и „Св. Кирил и Методиј“, да започне во сабота во 19 часот и да заврши во вторник во 5 часот наутро.