Close Menu

Издадени највисоки предупредувања за силно невреме во Италија, Хрватска, Словенија, Австрија и Унгарија

0
By on ВЕСТИ, СВЕТ

Силно невреме денеска го погоди Милано, предизвикувајќи голема материјална штета и прекин на сообраќајот. Поради дрвјата кои паднаа на сообраќајниците одредени делници беа затворени. Блокирани се и неколку железнички линии поради „сериозна штета на станицата Монца“. Возовите во различни правци во Ломбардија доцнат повеќе од еден час, а многу линии се откажани.

Една 58-годишна жена починала откако попладнево врз неа паднало дрво во градот Лисоне. Иако случајните минувачи веднаш повикале помош, спасувачите кои први пристигнале на локацијата не успеале да ја спасат повредената жена. На пожарникарите им требало долго време да го извлечат нејзиното тело од под стеблото, пренесува АНСА.

Пожарникарите добиле стотици повици да ги санираат последиците од невремето, а ситуацијата е особено проблематична во северозападниот дел на Милано. Три лица се повредени при пад на дрвја врз автомобили во Легнан. Во првиот случај, дрво паднало врз автомобил кој се движел по патот при силно невреме во центарот на градот.

Возачот успеал да излезе од автомобилот без сериозни повреди, но бил пренесен в болница на дополнителни прегледи. Уште три големи дрвја паднаа врз неколку автомобили, при што беа повредени 34-годишна жена и 81-годишна жена, кои со полесни повреди и пренесени в болница. Силен дожд поплави патишта и деловни објекти.

Дожд со силен ветер ја зафати и провинцијата Варезе. Пожарникарите добиле бројни повици поради паднати дрвја, поплави и оштетени покриви.

Во моментов на територијата на покраината се ангажирани 50 пожарникари со 12 возила. Најпогодени беа областите на границата со провинциите Милано и Комо.

Лошото време предизвика затворање на железничката станица Галарате и оштетување во внатрешноста на станицата Монца.

Хрватскиот државен хидрометеоролошки завод (ДХМЗ) издаде портокалово предупредување за вечерва поради невреме со грмотевици во регионот на Загреб, извести Дирекцијата за цивилна заштита, објави Индекс.хр.

Во загребскиот регион локално се предвидуваат поизразени врнежи од дожд и грмежи проследени со силен ветер и невреме.

Од Дирекцијата за цивилна заштита известија дека портокалово предупредување за невреме со грмотевици е издадено и за утре во пет региони: Загреб, Риека, Карловац, Госпиќ и Осиек.

Граѓаните се повикуваат да бидат подготвени за силни грмежи кои можат да предизвикаат големи штети и да се заштитат од гром. Можни се штети на имот и дрвја, локални поројни поплави, налети на силен ветер и град, како и прекини во активностите на отворено и сообраќајот.

Предупредување за големо невреме е издадено, исто така, и во Словенија, Австрија и Унгарија.

Г. Т.

Share.