Нови обвинувања за вмешаност на обложувачкото подземје во тенисот. Овојпат доаѓаат од Израелецот Амир Вејнтрауб, позициониран на 222. место на АТП ранг листата. Тој истакна дека непристојни предлози стигнуваат и до најдобрите меѓу кои и Новак Ѓоковиќ.
„Обложувачката мафија ги контактира сите тенисери. Дури и најдобрите како Ѓоковиќ. Тие луѓе им приоѓаат на сите. Ова се случува од недела во недела. Поготово во Русија. Некои послабо рангирани играчи можеби и ќе паднат на искушението бидејќи им нудат пари колку што би заработиле на АТП турот во текот на цела сезона“, изјави Вејнтрауб за израелски „Тајмс“.
Тенисот, се чини, одамна е со избледен епитет на „бел спорт“. Долг период наназад, од разноразни тениски кругови, се слуша и чита за наводи дека голем број мечеви се лажирани.
„За само еден пораз може да заработите колку и тенисер од мој ранг во текот на една календарска година“, додаде 222. светски рекет.
Вејнтрауб е на возраст од 30 години. Во целокупната кариерата од турнирски настапи има заработено 440.000 долари.