Бруто домашниот производ (БДП) на 65-те најранливи земји во светот ќе се намали за 20 проценти во просек до 2050 година и за 64 отсто до 2100 година, доколку светот се загрее за 2,9 степени Целзиусови, се вели во извештај што е објавен денеска на климатскиот самит КОП26 во Глазгов.

Дури и ако глобалниот пораст на температурата се ограничи на 1,5 степени Целзиусови, што е во согласност со најамбициозната цел на Парискиот договор, истите земји ќе претрпат удар врз БДП од 13 отсто до 2050 година и 33 проценти до крајот на векот, се вели во студијата нарачана од „Кришчн Ејд“ (Christian Aid).

Просечната температура на површината на Земјата до денеска е зголемена за 1,1 степени Целзиусови во споредба со нивоата од крајот на 19 век. Наодите на „Кришчн Ејд“ покажуваат дека на повеќе од една третина од земјите во светот им е потребна итна помош за градење на отпорност за да можат нивните економии да ги издржат горештините, сушите, поплавите и бурите, кои стануваат поинтензивни и посмртоносни поради глобалното затоплување.

Способноста на земјите од глобалниот југ да се развиваат одржливо е сериозно загрозена. Политичките избори што ги правиме сега се клучни за да се спречи натамошна штета, изјави главниот автор Марина Андриевич од Универзитетот Хумболт во Берлин.

Осум од десетте најпогодени земји се во Африка и две во Јужна Америка Сите 10 земји се соочуваат со штета врз БДП од повеќе од 70 проценти до 2100 година, при сегашната траекторија на климатската политика и 40 проценти дури и ако глобалното затоплување е ограничено на 1,5°C.

Земја која се соочува со најсериозни загуби во БДП е Судан, кој беспомошно доживеа поројни дождови и големи поплави во септември, кои погодија повеќе од 300.000 луѓе. До 2050 година, БДП на земјата ќе се намали за 32 проценти, а до 2100 година за 84 отсто, во споредба со ситуацијата во која би била доколку нема климатски промени.

Земјите опфатени со извештајот сочинуваат два клучни преговарачки блока на климатските разговори на ОН кои траат до петок: Најмалку развиените земји и Алијансата на мали островски држави. Малите островски држави се особено ранливи на бури кои се влошуваат со зголемувањето на морската вода.

Студијата не ги зема предвид мерките за адаптација кои потенцијално би можеле да намалат дел од штетите. Богатите влади досега издвојуваа само скромни суми за да им помогнат на сиромашните земји да се приспособат на климатските промени.

„Африка најмалку придонесе за климатските промени, но овој извештај покажува дека ќе се соочи со најлошите последици. Тоа е длабоко неправедно“, рече Мохамед Аду, директор на тинк-тенк за клима и енергија со седиште во Најроби, Power Shift Africa.