До Владата на Република Северна Македонија преку Министерството за надворешни работи денеска од француското претседателство пристигна предлог со идеи кои се однесуваат на македонските jaвно изнесени позиции и ставови.

Извори за Нова ТВ неофицијално велат дека во преговарачкиот процес во предлогот стои чист македонски јазик во ЕУ, а Протоколот и историските прашања не се дел од преговарачката рамка. На само неколку часа пред завршетокот на француското претседателство дојде до пресврт во закочениот евроинтеграциски процес на Македонија.

Најпрвин францускиот претседател Емануел Макрон објави од Мадрид дека има решение за бугарската блокада и дека Македонија може да ги почне преговорите, а на него се надоврза и Владата во Скопје која објави дека е пристигнат нов француски предлог.

Ваквиот развој на настаните го поздрави и Шарл Мишел, претседателот на Европскиот совет, кој на својот твитер профил објави дека го поздравува решението на француското претседателство со ЕУ за договорот што ќе го отвори патот за старт на пристапните преговори со Македонија.

Благодарност упати и премиерот на Македонија Димитар Ковачевски до Претседателот Макрон и Француското претседателство, за нивните напори да се надминат пречките и да се зачува европскиот кредибилитет на Балканот.

(Р.Н.)