Судија за извршување санкции од Основниот суд во Гевгелија денеска издал упатен акт за Катица Јанева, екс-специјалната јавна обвинителка, за издржување казна затвор во траење од седум години во затворот Идризово во Скопје. Извори за НоваТВ брифираат дека Јанева се уште не пристигнала во приемното одделение на затворот Идризово, но, според процедурата, по издавање на упатниот акт, таа во КПУ Идризово треба да биде донесена со полиција.
Според проценката на степенот на ризик, ќе биде утврдено, исто како и во случајот со Бојан Јовановски, кој од вчера се наоѓа во затворот Идризово, дали Јанева да биде сместена во затворено, полуотворено или отворено одделение.
Истиот извор за НоваТВ дополнува дека врз основа на годините поминати во притвор, а досега поминаа две години, кои се пресметуваат како дел од вкупната затворска казна, значи дека на Јанева ѝ остануваат уште околу пет години, врз основа на што не е исклучено таа да биде сместена и во отвореното одделение.
Апелациониот суд Скопје постапувајки по Кривичниот предмет КОКЖ-91/20, познат во јавноста под името „Рекет“ вчера донесе одлука со која жалбите на обвинетиот Бојан Јовановски од Скопје и обвинетата Катица Јанева од Скопје ги одби како неосновани , а ја потврди првостепената пресуда.
Јанева беше осудена на седумгодишна казна затвор за делата „Примање награда за противзаконитео влијание“ и за „Злоупотреба на службената положба и овластувања“.
Мирјана Трпческа