Измените на законот за заштита на укажувачите е од есенцијална важност за да ги заштитиме сведоците на Специјалното јавно обвинителство кои сакаат да соработуваат, вели првата жена на оваа институција Катица Јанева, која се обраќаше по повод Меѓународниот ден на укажувачите.
Јанева во обраќањето потенцираше дека самата институција со која раа раководи се чувствува како укажувач, информирајќи ги граѓаните преку своите прес-конференции за криминалот, а воедно посочи и дека обвинетите во случајот „Пуч“, преку своите прес-конференции ја вршеле истата улога бидејќи објавиле коруптивно и криминално владеење на една партија и одредени функционери.
– СЈО не отстапува и нема да се откаже од истражувањето на криминалот и корупцијата како институција која е одговорна за својата задача. Не смее да се замолчи и да се затворат очите, потребно е истражување на секој криминал, а граѓаните се свесни дека тоа е нешто од заеднички интерес во кој тие се клучниот дел. Свиркачи беа и обвинетите во случајот „Пуч“ , кои преку своите пресконференции објавија коруптивно и криминално 10-годишно владеење на една партија и одредени фунцкионери, рече обвинителката.
Во „Пуч“ беа обвинети лидерот на СДСМ, Зоран Заев и поранешниот директор на УБК, Зоран Верушевски, а СЈО кон средината на јануари го повлече обвинението за нив бидејќи фактичката состојба прикажана во обвинителниот акт била во спротивност со доказите со кои располага Специјалното јавно обвинителство.
На истиот настан денес организиран од страна на Коалицијата за заштита на укажувачите, помеѓу говорниците беше и првата жена на „Транспаренси Интернешнл“, Слаѓана Тасева, која воедно е и еден од авторите на Законот за заштита на укажувачите.
Таа гарантира дека законот е многу добар, но многу малку или речиси ниту една државна институција не го применува.
– Имаме еден од најдобрите закони за заштита на укажувачи од сите што ги познавам. Она што ни недостасува и за што мораме сите заедно да работиме е да ги натераме институциите да го применат. На 8.март минатата година стапи законот а денес на прсти се бројат институциите кои ги спровеле. Антикорупциска комисија, Обвинителството, МВР и Омбудсманот треба да обезбедат канал за надворешно укажување како најповикани, рече Тасева.
Таа воедно потенцираше дека најголем укажувач во Македонија е човекот кој го собрал материјалот од неовластеното прислушување и го доставил, и рече дека сите кои се засегнати со прашањето за корупција треба да се изборат судовите во Македонија да дозволат истиот да се користи како доказ за големите криминали направени во земјава последните години.