Вардар пристигна во Истанбул, го одработи официјалниот тренинг пред реваншот со Фенербахче и смирено ги дочекува возвратните 90 минути против великанот на турскиот фудбал за историја на клупскиот во Македонија. „Црвено-црните“ имаат 2:0 од првата средба на „Телеком арена“ и реални шанси да станат први претставници од домашната сцена што ќе заиграат во групи во натпреварување на УЕФА. Но, Чедомир Јаневски не дозволува евентуална еуфорија што би довела до коцкање на одличната шанса.

„Ќе биде тешко. Оние 2:0 од Скопе не смее да нè залажат. Добри се, позитивни се, придонесуваат за сигурност, но не даваат никаква гаранција. Не значат ништо за нас бидејќи работата не е завршена. Дојдовме во Истанбул да играме и да се надигруваме со големиот противник како да е 0:0, како да немаме никаква предност“, нагласи вардаровиот менаџер кој минатата среда ја презеде клупата од Гоце Седлоски.

Јаневски е свесен за квалитетите на Фенербахче. Свесен е дека реваншот ќе биде поинаков од дуелот во Скопје, свесен е дека турскиот тим ќе има голема поддршка од трибините и ќе тргне офанзивно по брз гол за амортизирање на притисокот. Сето тоа го предочува и на фудбалерите кои мора да останат смирени и концентрирани.

„Квалитетите на противникот се добро познати. Имаат индивидуалци кои може да решат натпревар со еден потег. Ќе играме и пред полн стадион. Но, верувам во овие момчиња дека ќе успеат да остават се настрана и ќе прикажат игра за резултат што ќе нè одведе во групната фаза. Предноста што ја имаме ни дава сигурност пред натпреварот, а кога ќе почне ќе треба да одиграме тимски и организирано како единствен начин за осигурување на посакуваната цел“, дополни Јаневски.

Дуелот меѓу Фенербахче и Вардар на стадионот „Шукру Саракоглу“ е закажана за 19,30 часот. Главен судија во натпреварот ќе биде Полјакот Даниел Стефански кому ќе асистираат сонародниците Марсин Бониек и Давид Игор Голис.