Најмалку 57 лица починаа во Јапонија во последните десетина дена како последица на високите температури. Топлотниот бран како факт го земаа во предвид и организаторите на Летните олимписки игри во Токио во 2020 година како потенцијална опасност по здравјето на спортистите и навивачите, па веќе отпочнаа со барање на начини за амортизирање на тешко подносливите жештини. Се размислува на комплет мерки од распрскувачи и пакувања со мраз до поставување на одмаралишта во сенка и шатори за освежување на контролните пунктови.
Веќе е извесно дека почетокот на маратонските трки, на пример, ќе бидат поместени за еден час порано и ќе стартуваат во 6 часот наутро – женскиот е закажан на 2 август, а машкиот на 9 август, последниот ден од Олимпијадата.
Во грижите на организаторите, покрај навивачите и спортистите, влегуваат и волонтерите, особено оние кои ќе бидат ангажирани во натпреварите на отворено.
„Маратонците ќе завршат со трката за, отприлика, два часа додека волонтерскиот персонал мора да остане многу повеќе“, вели 69 годишниот тркач, Јуки Ока.
Покрај маратонот, во тест фокусот на Јапонците ова лето ќе бидат и други спортови како одбојка на песок или рагби.
Температурата во Токио на 24 јули, денот на кој догодина е закажано свеченото отворање на Игрите, беше над 31. Целзиусов степен. Новинската агенција „Ројтерс“ ја пренесува јапонската Агенција за управување со природни непогоди според која билансот од тропските временски (не)прилики од 29 јули до 4 август е 57 починати лица во целата земја, а повеќе од 1.800 лица биле хоспитализирани само во Токио.
Агенцијата притоа потсетува и на ланските температури што во овој период од годината достигнаа рекордни 41,1 степен во северниот дел на Токио каде се организираа Олимписките игри во далечната 1964 година. Но, настанот пред повеќе од пола век, токму од тие причини, се одржа во октомври.