Ниту еден од шесттемина обвинети лица за случајот „Плацеви на Водно“ денеска во скопскиот Кривичен суд не признаа вина. Обвинителството Груевски го обвини за две кривични дела – перење пари и за противправно стекнување и прикривање имот. Камчев, неговата мајка и уште две лица се обвинети за перење пари, додека Мијалков за помагање при перење пари.
Бизнисменот Јорадан Камчев, кој е обвинет за случајот „Плацеви на Водно“ тврди дека не е виновен. Тој во скопскиот Кривичен суд денеска рече дека знае зошто го гони обвинителката Лиле Стефанова.
– Самиот факт дека е направен груб фалсификат од страна на обвинителот и манипулација кон судиите што го оценувале обвинителниот акт е уште еден доказ дека војната што обвинителството т.е. дотичната обвинителка ја води против мене заради предметот „Рекет“ добро познат на јавноста, но сега со уште пожестоко темпо со обвинение на една страница и две реченици за кое шест месеци сум во притвор“, рече Камчев во судот.
Тој тврди дека обвинителството нема докази оти тој, неговата мајка и фирмата „Орка Холдинг“, наводно помоглане во перење пари.
– Ќе докажам дека јас, Јордан Камчев и мојата мајка Ратка Куноска Камчева на 77 години возраст, досега нема сторено ниту едно кривично дело, во оваа постапка ќе останеме чисти заради тоа што не сме го сторило ова измислено кривично дело познато само зашто се поднесува само од страна на обвинителството, рече бизнисменот Камчев.
И поранешниот директор на Управата за безбедност и контраразузнавање, Сашо Мијалков, кој е обвинет за случајот, не се чувствува виновен. Обвинетиот експремиер Никола Груевски не се изјасни по прашањето за вина, бидејќи тој е во бегство во Унгарија, а на него ќе му се суди во отсуство.
Адвокатите на обвинетите сметаат дека ова е монтиран судски процес.
– Укажавме на тоа дека е монтиран судски предмет, затоа што не постои ниту еден, апсолутно, ниту еден материјален доказ кој го оправдува обвинителниот акт кој е покренат. Ако немате кривично дело од кое се создадени парите со криивчното дело, па да овозможите перење пари, односно да помогнете, а такво кривично дело нема, тоа постојано беше укажувано од моите колеги, не може да опстои ни ваков обвинителен акт, изјави адвокатот Ѕвонко Давидовиќ.
Обвинителството за гонење на организиран криминал и корупција тврди дека шестмина обвинети му помогнале на Груевски со 1,3 милиони евра од партиски донации да купи плацеви на Водно. Според обвинението, Груевски ги злоупотребил партиските пари и купил парцела на Водно. Тој ги пуштил парите во оптек, а на Мијалков му помогнал да го купи плацот за да го прикире изворот на парите, но и дека тој е сопственик на парцелата.