Бројот на официјално потврдени загинати во вчерашните пожари во Грција е 50 лица, додека пак 172 се повредени од кои 11 сериозно, а по воден пат биле спасени 715 лица.

Како што јави МИА од Атина, портпаролот на грчката влада и министер без ресор, Димитрис Ѕанакопулос, го соопшти билансот од пожарите, до 11.30 часот по локално време.

Фото: Greek Reporter

– До овој момент во болниците во Атика, згрижени се 156 возрасни лица, од кои 11 се во сериозна состојба и се поврзани на апарати и 16 деца чии животи не се во опасност. Во овој момент, за жал бројот на жртвите е 50 лица. Противпожарната служба, во соработка со полицијата продолжува со тешката задача на евиденцијата и информирањето ќе биде континуирано. Од друга страна, бродови на крајбрежната служба и нуркачки единици, ја проверуваат областа за пронаоѓање на можни заглавени, додека до овој момент, извлечени се вкупно 715 луѓе, главно од областа Мати, рече Ѕанакопулос.

Тој  додаде дека во спасувачката акција по море учествувале 12 брода на крајбрежната служба, 30 приватни чамци, додека пак од воената морнарица 1 фрегата, 2 брода, 3 хеликоптери и 3 глисери.

Greek Reporter

Според портпаролот на грчката влада, продолжуваат напорите на државниот механизам за справување со последиците од вчерашните катастрофални пожар.

Во гаснењето на пожарите, учествувале над 600 пожарникари со над 400 возила , 7 канадери и 10 хеликоптери. Активни беа 3 жаришта, додека пак утрово, пожарот иако е ставен под контрола, се уште не е целосно изгасен.

Грција го активираше европскиот механизам за цивилна заштита за да добие помош од европските партнери. Досега Шпанија, Кипар и Израел испратиле помош.

Европската комисија во следните неколку часа ќе го активира Европскиот механизам за цивилна заштита за да и помогне на Грција каде во пожарите досега загинаа околу 50 лица.

– Ја завршуваме анализата на ситуацијата, механизмот за цивилна заштита ќе биде активиран во наредните часови, изјавил извор од европските институции.

Greek Reporter

Според него, мониторинг на ситуацијата со катастрофалните шумски пожари во Грција во моментов спроведува координативен центар за реагирање при вонредни ситуации, кој ќе обезбеди неопходни средства за помош на Грција од земјите членки.

Станува збор, пред се, за испраќање противпожарни авиони и хеликоптери и други мобилни средства за гасење пожари, противпожарни бригади и спасувачи, медицински тимови, но и, доколку се неопходни, лекови, респиратори и средства за индивидуална заштита на персоналот кој учествува во гаснењето на пожарите.

Greek Reporter

Шпанската Влада претходно соопшти дека денеска испратила два канадери како помош на Грција. Министерството за земјоделство на Шпанија соопшти дека секој од авионите може да носи 5,5 тони вода. Со авионите пилотираат членови на шпанските вооружени сили.

И Македонија испраќа помош

Аднан Џаферовски, директорот на Дирекцијата за спасување, утринава изјави дека Македонија ќе испрати два авиони за гаснење на пожарите во Грција. Тој вели дека од синоќа се во постојан контакт со центрите во Грција.

„Од утрово сме на координативна седница, се организираме за пожарите и понудивме помош. Чекаме повретен сигнал. Од утрово се спремни два авиони за гасење пожар. Екипите се спремни. Се очекува секој момент да тргнат“, вели Џаферовски за Макфакс.