Првата амбасадорка на Македонија во САД, Љубица Ачевска и амбасадорката Елеонора Каранфиловска- Ратклиф за НОВА ги анализираат промените во Америка зависно од победникот на претседателските избори, како и улогата и односите на Америка во Македонија доколку американските граѓани се одлучат за републиканецот Трамп или демократката Клинтон.
Дали нешто ќе се смени во САД доколку победи Хилари Клинтон или републиканцот Доналд Трамп?
„Не, не мислам така, затоа што оваа држава има многу силна традиција за демократија, за судскиот систем и за надворешната политика. Мислам дека САД е се уште моќна држава и во таа смисла и сметам дека системот ќе продолжи како силна демократија. Секако дека ќе има промени во луѓето кои ќе дојдат на власт, но верувам дека САД ќе продолжи да ги следи правците на демократска држава и се уште ќе биде заинтересирана со тоа што ќе се случува во светот и да им помага на државите на кои им е потребна помош. Исто така, мислам дека кој и да дојде на власт ќе мора многу да работи за да биде претседател на сите држави, затоа што имаше многу цинична, црна кампања. Мислам дека претседателот ќе треба да ги спои сите заедно, за државата да може да почне да заздравува од кампањата и да го направи она што е најдобро за граѓаните на САД, да го има в предвид и останатиот дел од светот, да им помогне на сите да се согласуваат и да има подобар живот за сите“.
Кога би направиле компаративна анализа, меѓу Хилари Клинтон и Доналд Трамп, кои се нивните главни карактеристики како би ги дефинирале? Што им е заедничко, а што е она што ги разликува?
„Клинтон има многу политичко искуство. Таа беше прва дама, државен секретар, сенатор и има искуство во работата во Вашингтон и во комуникацијата со лидерите во светот. Има подобро разбирање за меѓународната состојба и во таа насока таа е многу квалификувана да биде претседателка на САД или на било која држава. Што се однесува до господинот Трамп, тој е многу успешен бизнисмен, има изградено многу успешна бизнис империја, има и големо економско искуство, а навистина нема политичко искуство, и мислам дека тоа на многу луѓе им е привлечно и затоа има поддршка од многу луѓе. Да бидеме искрени, работите во политичката арена во Вашингтон не се толку добри во последно време, а тој доаѓа како аутсајдер и токму од овие причини мислам дека има толку многу поддршка. Мислам дека многу луѓе се изненадени од тоа што тој дојде дури до тоа да биде републиканскиот кандидат за претседател. Во секој случај мислам дека без оглед на тоа кој ќе ја добие власта, двајцата кандидати околу себе треба да имаат луѓе кои ќе им помогнат да ја водат државата, луѓе со искуство и знаење за да се справат со меѓународните позиции и економски проблеми. Мислам дека тоа за двајцата ќе биде многу важно. Политичките лидери, конгресот ќе мора да му дадат шанса на претседателот, да го поддржат, да му помогнат да ја води државата. Исто така мислам дека е многу важно и граѓаните да го поддржат претседателот, затоа што кој и да е победи, претседател на САД, а граѓаните мора да го поддржуваат претседателот. Исто така сметам дека е важно и меѓународната заедница да го поддржи новоизбраниот претседател и да комуницира со него за доброто на сите“.
Дали би имало некаква промена во политиката на Америка кон Македонија во зависност од тоа кој кандидат ќе победи?
„Мислам дека нема да има големи промени во односите на САД кон Македонија без оглед кој и кандидат да победи. Но, исто така мислам дека Македонија мора да работи за да ги зајакне односите со САД и луѓето кои се во САД да работат за да се осигураат за работите да не се влошат и да ги зајакнат врските меѓу САД и Македонија“.