Еден од десет луѓе во европскиот регион на СЗО ќе биде заразен со ковид-19 до крајот на оваа недела, изјави регионалниот директор на организацијата, Ханс Клуге.
Минатиот месец предупредивме дека до почетокот на 2022 година би можеле да загубиме уште пола милион животи, доколку не преземеме итни мерки, рече тој.
„Помина еден месец и починаа уште 120.000 луѓе, а во регионот има уште 10 милиони случаи на ковид-19. До крајот на оваа недела, секој десетти човек во европскиот регион ќе биде заразен со ковид-19, што ќе биде потврдено со лабораториски тестови, додаде Клуге.
Со наближувањето на крајот на годината и сезоната на празници, смртните случаи регистрирани од ковид-19 достигнаа високо ниво од околу 4.100 смртни случаи дневно, што е двојно повеќе од 2.100 смртни случаи на ден на крајот на септември 2021 година, рече тој. Пред само две недели, вкупниот број на смртни случаи од ковид-19 во 53 земји во регионот надмина еден и пол милион.
„Процентот на регистрирани случаи е зголемен во сите возрасни групи, со најголем процент во возрасната група од 5 до 14 години“, рече Клуге.