Европскиот првак Ливерпул го победи јужноамериканскиот фудбалски владетел Фламенго со 1:0, во финалето на Светското клупско првенство што се одржа во Катар. Стрелец на единствениот гол беше Роберто Фирмињо во 99 минута од средба, откако основниот дел заврши без голови. 

Ливерпул и Фламенго го одиграа четвртото финале без голови по 90 минути на клупските мундијали. Но, „црвените“ од „Енфилд“ ја продолжија традицијата која вели дека само еднаш досега тимот што постигнал погодок во продолженијата, не ја освојувал титулата. 

Премиерлигашот до наредното клупско СП на ФИФА ќе носи амблем на своите дресови како потсетник дека е планетарен фудбалско владетел. За тимот на чие кормило е Јирген Клоп, ова е вкупно 47 трофеј во клупската историја што го прави рекордер во англискиот фудбал.

Ливерпул има два пехара повеќе од Манчестер јунајтед, двата англиски клуба кои го имаат освоено Светското клупско првенство. Но, „црвените“ станаа единствени од Островот кои во една календарска година триумфираа во Лигата на шампиони, во европскиот Суперкуп и на Светското клупско првенство.

Фирмино и голманот Алисон Бекер, пак, се први во историјата кои во иста година станале европски и светски клупски прваци и шампиони на Копа Америка.