Утре на владина седница ќе се дeбатира за планот за водење на кампањата за есенскиот референдум. Според информации на НОВА ТВ, кампањата ќе се води слично како за избори, преку средби со граѓани и митинзи, а ќе бидат вклучени поголемиот дел од министрите. На средбите со граѓаните, ќе се потенцира дека со Договорот се прескокнува и последната пречка за влезот на Македонија во ЕУ и НАТО кои се гарант за безбедноста на идните генерации.
„Преку кампањата ќе се обидеме Договорот со Грција да го приближиме до сите граѓани. Договорот го заштитува македонскиот идентитет. Во член 7 од Договорот, македонскиот идентитет ја отсликува нашата територија, нашиот народ со своја култура и наследство и нашиот јазик. Со Договорот нашето државјанство е потврдено како македонско, официјалниот јазик на нашата држава е заштитен како македонски без додавки, а македонската иднина е обезбедена. Историската шанса е пред нас имаме одговорност таа шанса да ја искористиме на 30 септември, кажа Заев.
Тој ги повика граѓаните да го прочитаат Договорот и да „видат дека се што беше проблематично за нашиот идентитет е потврдено“. Заев исто така кажа дека „за соседите никогаш не беше спорен идентитетот на помалите заедници во Македонија, никогаш не го оспорувале нивниот идентитет, само македонскиот кој сега го заштитуваме“.
Иако ВМРО ДПМНЕ се уште тактизира со одлуката дали ќе повика на бојкот или ќе го повика членството да гласа „против“ Договорот, Мицкоски денеска откри дел од тезите со кои ќе настапат во кампањата. Наспроти ставот на власта дека со Договорот се заштитува македонскиот идентитет, Мицкоски вели дека тоа не е вистина.
„Гледаме дека Владата целокупната своја кампања ја темели на тоа дека го сочувува идентитетот. Еве едно прашање до Владата и до сите оние кои стојат до таа теза дека е зачуван идентитетот: Како е зачуван идентитетот кога институционалниот идентитет ќе се изгуби, рече Мицкоски.
Според него, доколку се изгуби институционалниот идентитет, што претставува, како што кажа, трејдмарк за националниот идентитет, не се зачувува идентитетот.
Мицкоски кажа дека одлуката дали ќе го бојкотираат рефрендумот или ќе гласаат против ќе ја донесат партиските органи – Извршниот и Централниот комитет.
Во кампањата за рефрендумот активно ќе учествува и ДУИ.
„Ќе се ангажираме со сите капацитети што ги имаме, за да се мобилизира секој граѓанин и референдумот да биде успешен. Ова е одлучувачки момент за сите нас и позитивен референдум ќе значи победа на мирот и стабилноста“, кажа Ахмети на одбележувањето на 13 години од Рамковниот Договор.
Кампањата, велат од власта дека ќе биде информативна, а не пропагандистичка.
Повик до граѓаните да гласаат „за“ на референдумот упати и Евелин Фаркаш, поранешна заменичка на помошникот секретар за одбрана на САД задолжена за Европа и Азија во администрацијата на Барак Обама, која присуствуваше на одбележувањето на Рамковниот договор.
„Референдумот мора да победи. Неуспехот ќе биде на штета на демократијата, владеењето на правото и мирот“ кажа Фаркаш.