Амбасадата на Украина во РСМ објави остра реакција на руските дезинформациски наративи кои се појавија и во дел од македонските медиуми.
„Со длабока загриженост и огорченост ја осудуваме објавата на содржини во македонските медиуми што се засноваат на отворено дезинформативни наративи, создадени и распространети од руската пропагандна машинерија. Вестите под наслови „Се подготвува марш кон Киев и соборување на Зеленски?“ и „РИА Новости“: Се подготвува марш кон Киев и соборување на Зеленски“ објавени во Кумановски Муабети и Слободен печат, со повикување на руското изворно РИА Новости, се пример на манипулативна информативна кампања чија цел е дестабилизација на украинското општество, поткопување на довербата во легитимното раководство на државата и дискредитација на борбата на Украина за слобода и независност“, се вели во реакцијата на украинската амбасада.
Амбасадата ги повика македонските медиуми да ги проверуваат фактите и да се воздржат од пренесување руску пропагандни пораки.
„Ги повикуваме македонските медиуми да се придржуваат до новинарските стандарди, да ги проверуваат фактите, да се воздржуваат од пренесување на руски пропагандни пораки и одговорно да се однесуваат кон изворите на информација. Во услови на војна, кога Руската Федерација секојдневно користи информативно оружје со иста жестина како и ракетите насочени кон детски игралишта, ширењето на лажни вести во земја што е членка на НАТО е неприфатливо“, се вели во реакцијата.
Борбата против дезинформациите е заедничка обврска на сите, реагира Амбадата на Украина во нашата земја.
„Европските држави треба да застанат во одбрана на вистината, демократијата и слободата. Затоа борбата против дезинформацијата е заедничка обврска на сите – новинарите, политичарите и граѓанското општество. Украина високо ја цени поддршката од своите партнери и искрено се надева дека за подмолните и манипулативни наративи повеќе нема да има место во информативниот простор на земја што ги споделува европските вредности“, реагира украинското дипломатско претставништво.
Според амбасадата, Русија не е заинтересирана за прекин на огнот и дека дезинформациите се дел од арсеналот на агресорот.
„Руската Федерација не е заинтересирана за прекин на огнот – ширењето на дезинформации е еден од инструментите за поттикнување на смртоносниот оган“, стои во заклучокот на јавната реакција на Амбасадата на Украина во РСМ.
Претходно, ЦИВИЛ објави извештај од својот мониторинг на дезинформациите, објавен на англиски јазик на интернет порталот Civil.Today што беше прифатен од голем број релевантни аналитичари и лидери во граѓанското општество во Европа и САД.